काठमाडौं, १४ मंसिर । सिन्धुलीमा मदन भण्डारी राजमार्गअन्तर्गत दुधौली नगरपालिका–२ गागनमा यात्रुवाहक बस र मोटरसाइकल एकआपसमा ठोक्किँदा एक जनाको मृत्यु र एकजना गम्भीर घाइते भएका छन् ।
पोखराबाट कटारीतर्फ गइरहेको बा ३ ख ७४६२ नम्बरको बस र डकाहाबाट झुँगा आउँदै गरेको ज ८ प ८१६४ नम्बरको मोटरसाइकल एक आपसमा ठोक्किँदा दुर्घटना भएको हो । दुर्घटनामा दुधौली नगरपालिका–३ का २५ वर्षका महेश कुमारको मृत्यु भएको प्रहरीले बताए ।
दुधौली–४ स्थित सिर्थौली अस्पतालमा उपचारकै क्रममा उनको मृत्यु भएको सिन्धुलीका प्रहरी प्रमुख लालध्वज सुवेदीले जनाए । मोटरसाइकलमै सवार कमलामाई नगरपालिका–१४ का २६ वर्षीय दिपेश कुमार गम्भीर घाइते छन् ।
उनको सिर्थौली अस्पतालमै उपचार भइरहेको छ । दुर्घटनापछि बस चालक, कटारी नगरपालिका–३ का ३२ वर्षीय स्यामकुमार भट्टराई फरार रहेका छन् ।
दुर्घटनापछि प्रहरी चौकी हतपते र इलाका प्रहरी कार्यालय डकाहबाट खटिएको टोलीले घटनाबारे अनुसन्धान भइरहेको बताइएको छ । बसका सबै यात्रु भने सकुशल छन् ।
