काठमाडौं, १२ मंसिर । पूर्वपश्चिम राजमार्गअन्तर्गत मकवानपुरको हेटौंडा उपमहानगरपालिका–४ कर्रा चोकमा गएराति एक पैदलयात्रीलाई मोटरसाइकलले ठक्कर दिँदा मृत्यु भएका छन् ।
पशुपतिनगरबाट हेटौंडातर्फ गइरहेको ना ३८ प ५८५० नम्बरको मोटरसाइकलले पैदलयात्रीलाई ठक्कर दिएको प्रहरीले बताए ।
दुर्घटनामा परेकी पर्साको वीरगञ्ज महानगरपालिका–१६ नागुवा घर भई हाल हेटौंडा उपमहानगरपालिका–१० मा बस्दै आएकी ५५ वर्षीया खुइली डोमको उपचारका क्रममा हेटौंडा अस्पतालमा मृत्यु भएको हो ।
जिल्ला प्रहरी कार्यालयका प्रवक्ता, प्रहरी नायब उपरीक्षक पुष्कर बोगटीका अनुसार गम्भीर घाइते भएकी डोमलाई तत्काल उपचारका लागि अस्पताल ल्याइए पनि बचाउन सकिएन ।
दुर्घटना गराउने मोटरसाइकल तथा चालकलाई नियन्त्रणमा लिएर प्रहरीले आवश्यक अनुसन्धान अघि बढाएको छ ।
