जनकपुर, ४ मंसिर । बाराको सिमरामा बुधबार जेनजी समूह र नेकपा एमाले कार्यकर्ताबीच भएको झडपका सम्बन्धमा दुई जना वडाध्यक्ष पक्राउ परेका छन् ।
पक्राउ पर्नेमा जितपुर–सिमरा उपमहानगरपालिका–२ का वडाध्यक्ष धनबहादुर श्रेष्ठ र ६ का वडाध्यक्ष कैमद्विन अन्सारी छन् । स्थानीय जेनजी सम्राट (साइकुस उपाध्याय) ले दुवै जनामाथि कुटपिटको आरोप लगाउँदै इलाका प्रहरी कार्यालयमा जाहेरी दिएका थिए ।
जाहेरीपछि प्रहरीद्वारा उनीहरूलाई नियन्त्रणमा लिइएको र अन्य संलग्नको खोजी जारी रहेको बाराका प्रहरी प्रमुख सन्तोष तामाङले जनाए । घटनामा संलग्नलाई कारबाही नहुँदा जेनजीहरूले बिहीबार पथलैया सडक खण्ड अवरुद्ध गर्दै प्रदर्शन गरे ।
सडक खोल्ने क्रममा प्रहरीले बल प्रयोग गरेपछि केहीबेर तनाब सिर्जना भएको थियो । बुधबार एमाले युवा संघको ‘राष्ट्रिय जागरण कार्यक्रम’को विरोधमा जेनजी समूहले आन्दोलन गरिरहेको बेला एमाले कार्यकर्तासँग झडप भएको थियो ।
नेताहरू आउने सूचना पाएपछि प्रदर्शनकारीले सिमरा विमानस्थल अगाडि विरोध जनाउँदै गेटसमेत तोडफोड गरेको प्रहरीले जनाएको छ ।
