काठमाडौं, ३० कात्तिक । गृहमन्त्री ओमप्रकाश अर्यालले सोमबारदेखि सुरु हुन लागिरहेको दोस्रो संस्करणको नेपाल प्रिमियर लिग (एनपीएल) क्रिकेटका सुरक्षा तत्परता तथा अन्तिम तयारीबारे सम्बन्धित अधिकारीसँग बिस्तृत जानकारी लिएका छन् ।
काठमाडौँका प्रमुख जिल्ला अधिकारी इश्वरराज पौडेल र काठमाडौं प्रहरी प्रमुख रमेश थापाद्वारा प्रस्तुत सुरक्षा प्रतिवेदन सुनेपछि गृहमन्त्री अर्यालले सम्पूर्ण सुरक्षा संयन्त्रलाई उच्च सतर्कतामा रहन निर्देशन दिएका हुन् ।
गृहमन्त्रीको सचिवालयका अनुसार उनले क्रिकेट प्रतियोगिता अवधिभर घटनारहित वातावरण सुनिश्चित गर्न सुरक्षा व्यवस्थालाई अझ प्रभावकारी र चुस्त बनाउने आवश्यकता औंल्याए ।
यसअघि नेपाल क्रिकेट संघ (क्यान)ले उद्घाटन खेलका सबै टिकट सकिएको जानकारी दिँदै दर्शकलाई घरमै बसेर खेल हेर्न आग्रह गरिसकेको छ । क्यानका सचिव पारश खड्काले भिडियो सन्देशमार्फत टिमहरूलाई समर्थन घरबाटै जनाउन अनुरोध गरेका थिए ।
