काठमाडौँ, १६ कात्तिक । प्रधानमन्त्री सुशीला कार्कीको नियुक्ति असंवैधानिक भएको भन्दै सर्वोच्च अदालतमा रिट दर्ता भएको छ ।
अधिवक्ता डा. पुण्यप्रसाद खतिवडाले दायर गरेको रिटमा राष्ट्रपति रामचन्द्र पौडेलले संविधानविपरीत पूर्वप्रधानन्यायाधीश कार्कीलाई प्रधानमन्त्री नियुक्त गरेको दाबी गरिएको छ ।
खतिवडाले संविधान अनुसार पूर्वप्रधानन्यायाधीश प्रधानमन्त्री बन्न नपाउने भन्दै नियुक्ति बदर गर्न माग गरेका छन् । उनले राष्ट्रपतिले संविधानको धारा ७६ र १३२(२) को उल्लंघन गरेको र यो कदमले संवैधानिक संकट निम्त्याएको उल्लेख गरेका छन् ।
रिटमा राष्ट्रपतिसँगै सेना, राजनीतिक दल, सभामुख र राष्ट्रियसभाका अध्यक्षलाई पनि विपक्षी बनाइएको छ । खतिवडाले राष्ट्रपतिलाई संविधानले बाधाअड्काउ फुकाउने अधिकार नदिएको भन्दै धारा ३०५ अन्तर्गतको अधिकार प्रयोगको समयावधि सकिएको तर्क गरेका छन् ।
रिट निवेदनमा भनिएको छ, “आवश्यकताको सिद्धान्तको सहारा लिन सकिँदैन, यो नियुक्ति संविधानविपरीत भएकाले बदर हुनुपर्छ।”
