काठमाडौं, १६ कात्तिक । नेकपा (माओवादी केन्द्र) र नेकपा (एकीकृत समाजवादी) सहितका वामपन्थी दलहरूको एकता घोषणा यही कात्तिक २० गते हुने भएका छन् ।
आज बसेको माओवादी केन्द्र सचिवालय बैठकले काठमाडौंमा एकता घोषणा कार्यक्रम गर्ने निर्णय गरेको नेता अग्नि सापकोटाले बताए ।
उनका अनुसार माओवादी केन्द्र, माधवकुमार नेपाल नेतृत्वको एकीकृत समाजवादी, महेन्द्रराय यादव नेतृत्वको नेपाल समाजवादी पार्टी, विप्लव समूहबाट विद्रोह गरेका चिरन पुन (मिलन सी) समूह, प्रेमबहादुर सिंह समूह, राजु कार्की नेतृत्वको नेकपा समाजवादी तथा सुभाषराज काफ्ले नेतृत्वको जनसमाजवादी पार्टी नेपालबीच एकता घोषणा हुने तयारी भएको छ ।
एकतापछि नयाँ पार्टीको नाम ‘नेकपा समाजवादी’ राख्ने सहमति भएको छ । नयाँ पार्टीको वैचारिक आधारमा माओवाद हटाई माक्र्सवाद–लेनिनवाद मात्र रहने सहमति भएको पनि सापकोटाले जनाए ।
एकता प्रक्रियामा रहेका दलहरूले घोषणा समारोहपछि निर्वाचन आयोगमा नयाँ दल दर्ताको निवेदन दिने तयारी गरेका छन् । आयोगले आगामी फागुन २१ गते हुने निर्वाचनका लागि कात्तिक ३० गतेभित्र नयाँ दलले दर्ता प्रमाणपत्र प्राप्त गर्नुपर्ने समयसीमा तोकेको छ ।
