काठमाडौं, १८ असोज । धादिङ र तनहुँमा आएको लगातार पहिरोका कारण नारायणगढ–मुग्लिन सडकखण्डमा यातायात पूर्णरूपमा अवरुद्ध भएपछि प्रहरीले नागढुंगा चेकपोस्टमा यात्रुहरूलाई अगाडि नबढ्न आग्रह गर्दै माइकिङ गरिरहेको छ ।
काठमाडौं प्रवेश तथा बाहिरिने मुख्य नाका नागढुंगामा खटिएका सुरक्षाकर्मीहरूले लगातार माइकिङ गर्दै यात्रुहरूलाई चेतावनी दिइरहेका छन्– “धादिङतर्फ जान असुरक्षित छ, कृपया काठमाडौंमै फर्कनुहोस् र सुरक्षित रहनुहोस् ।
धादिङको बेनिघाट रोराङ गाउँपालिका–१० स्थित जवाङखोलामा आज बिहान करिब २ बजे पहिरो खसेपछि पृथ्वीराजमार्ग अवरुद्ध भएको थियो ।
केही समयको प्रयासपछि बाटो केही खुलाइए पनि पुनः बिहान ६ बजेतिर माथिबाट ठूलो पहिरो खसेपछि सडक पूर्ण रूपमा बन्द भएको छ ।
प्रहरीका अनुसार अहिलेको अवस्था हेर्दा तत्काल बाटो खुल्ने सम्भावना कम छ । त्यसैले सवारी चालक, सहचालक र यात्रुहरूलाई सुरक्षाको लागि काठमाडौंमै रोक्नुपर्ने अवस्था आएको हो ।
जिल्ला प्रहरी कार्यालय, धादिङले जानकारी गराए अनुसार जोखिमयुक्त क्षेत्रमा सवारी आवागमन राति ६ बजेदेखि रोकिएको छ । पहिरोको जोखिम कायम रहेका कारण बाटो खुलाउने कार्यमा पनि कठिनाइ भइरहेको छ ।
सुरक्षा जोखिम बढेकाले नागढुंगाबाट धादिङतर्फ जाने सवारी साधनलाई नियन्त्रण गरिएको र सवारी चालकहरूलाई सतर्क रहन आग्रह गरिएको छ ।
