हेटौँडा, १७ असोज । मकवानपुर प्रशासनले हेटौँडा–काठमाडौं जोड्ने कान्तिलोकपथ र भैँसे–काठमाडौं सडकमा असोज १७ देखि २० गतेसम्म बेलुका सवारीसाधन सञ्चालनमा रोक लगाएको छ ।
कान्तिलोकपथमा बेलुका ४ बजेदेखि बिहान ६ बजेसम्म र भैँसे–काठमाडौं सडकमा बेलुका ५ बजेदेखि बिहान ६ बजेसम्म सवारी चलाउन निषेध गरिएको हो ।
जल तथा मौसम पूर्वानुमान अनुसार तीन दिनसम्म मध्यमदेखि भारी वर्षाको सम्भावना रहेकाले पहिरोको जोखिमलाई मध्यनजर गर्दै रोक लगाइएको हो ।
प्रमुख जिल्ला अधिकारी स्किम श्रेष्ठले अत्यावश्यक बाहेक रातिमा यात्रा नगर्न र सबै स्थानीय तह तथा सरोकारवाला निकायलाई सतर्क रहन आग्रह गरेका छन् ।
