काठमाडौं, ५ असोज । जेनजी आन्दोलनका कारण निजी क्षेत्रमा ठूलो आर्थिक क्षति भएको भन्दै उद्योग वाणिज्य महासंघले सरकारलाई तत्काल कदम चाल्न आग्रह गरेको छ ।
महासंघका अध्यक्ष चन्द्रप्रसाद ढकालले प्रधानमन्त्री सुशीला कार्कीसँगको भेटमा निजी क्षेत्रको सुरक्षाका लागि सरकार र निजी क्षेत्रबीच बलियो समन्वय र सहकार्य आवश्यक रहेको बताए ।
उनले निजी क्षेत्रमाथि भएको आक्रमणले उद्यमशीलता र लगानी वातावरण कमजोर भएको उल्लेख गर्दै, यसको असर दीर्घकालीन हुन सक्ने चेतावनी दिए ।
महासंघ र अन्तर्राष्ट्रिय वित्त निगम (क्ष्ँऋ) को संयुक्त अध्ययनअनुसार, नेपालको अर्थतन्त्रमा निजी क्षेत्रको योगदान ८१ प्रतिशत छ भने कुल रोजगारीमध्ये ८६ प्रतिशत रोजगारी निजी क्षेत्रमै रहेको तथ्याङ्क सार्वजनिक गरियो ।
ढकालले देशभरको क्षति विवरण संकलन भइरहेको र प्रारम्भिक आकलनअनुसार करिब ८० अर्ब रुपैयाँ बराबरको क्षति भइसकेको जानकारी दिए । उनले विशेषगरी साना तथा ग्रामीण उद्योगहरूको अवस्था गम्भीर रहेको र कतिपय विवरण अझै संकलनको प्रक्रियामा रहेको बताएको छ ।
महासंघले सरकारलाई आन्दोलनमा प्रभावित व्यवसायीलाई कर्जा पुनर्संरचना र पुनर्तालिकीकरण सुविधा उपलब्ध गराउन, आयकर र भ्याटमा छुट प्रदान गर्न, र लगानीमैत्री नीति ल्याउन सुझाव दिएको छ। साथै, दोषीमाथि कारबाही नगरे दण्डहीनताको संस्कृति फैलिने र निजी लगानी निरुत्साहित हुने चेतावनी दिइएको छ।
