काठमाडौं, २९ साउन । नारायणगढ–मुग्लिन सडकखण्डअन्तर्गत तुइन खोलानजिक भारतीय ट्रकमाथि ढुंगा खस्दा ३ जना घाइते भएका छन् ।
नारायणगढबाट काठमाडौं जाँदै गरेको भारतीय नम्बरको ट्रक (केए ४३–६८५६) मा बिहीबार दिउँसो सडकमाथिबाट अचानक ढुंगा खसेको हो ।
घटनामा भारतको ब्याङ्लोर निवासी करिब ४५ वर्षीय चालक मेगुप्रसाद, २१ वर्षीय नहमान धुनियाँ र चालकका १८ वर्षीय छोरा सयद अफिद घाइते भएका छन् । ट्रक चालक मेगुप्रसादको टाउकोमा गम्भीर चोट लागेको छ ।
घाइते तीनै जनालाई उद्धार गरी उपचारका लागि भरतपुर अस्पताल पठाइएको प्रहरीले बताएको छ ।
ढुंगा खस्दा ट्रकमा पनि क्षति पुगेको र त्यसका कारण सडक केही समय एकतर्फी मात्र सञ्चालनमा आएको थियो । अहिले भने ढुंगा हटाएर सडक दुईतर्फी रूपमा सञ्चालनमा ल्याइएको छ ।
