जनकपुरधाम, २८ जेठ । महोत्तरीको भिठामोडको बजारमा पानी किन्ने बिषयमा विवाद हुदा जनकपुरधामका एकै परिवारका तीनजनालाई कुटपिट गरिएको छ ।
महोत्तरीको सम्सी गाउँपालिका ५ पोखरभिण्डा घर भई जनकपुरधाम उपमहानगरपालिका ६ बस्दै आएकी ३६ वर्षीया सविता महतो, उनका भाई द्वय ३२ वर्षीय सुजित साह र २५ वर्षीय सुनिल साहलाई कुटपिट गरेको छ ।
भारतबाट फर्कने क्रममा उनीहरुलाई स्थानीय शिवम होटेलमा पानी किन्न पुगेको बेला बिबाद भएको थियो । त्यस क्रममा होटल संचालकसहितले तीनैजनामाथि निर्घात कुटपिट गरेको पीडित सुजित साहले जानकारी दिएका छन ।
एकबोतल खाने पानी किन्दा ५० रुपैयाँ भारु उनीहरुले दिएका थिए । होटल संचालकले नेपाली रुपैयाँ दिनु पर्ने नत्र पानी नदिने भनेपछि विवाद भएको थियो । त्यसै क्रममा संचालकसहितले आफूहरुमाथि कुटपिट गरेको पीडित साहले भनेका छन ।
सुजितको टाउकोमा फुटेको छ भने सोविताको तालुमा फुटेको त्यस्तै सुनिलको कान र पिठ्युमा गहिरो चोट लागेको छ । उनीहरुको प्रादेशिक अस्पताल जनकपुरमा उपचार भइरहेको छ ।
