पर्सा, २० फागुन । मधेश प्रदेशको पर्सा जिल्लामा मोटरसाइकल दुर्घटना हुदा एकजनाको मृत्यु भएको छ । शुक्रबार राति पोखरिया नगरपालिकामा भएको मोटरसाइकल दुर्घटनामा एक जनाको मृत्यु भएको छ ।
साथै एक जना घाइते भएको प्रहरीले जनाएको छन् । मृत्यु हुनेमा जगरनाथपुर गाउँपालिका–५ मसिहानीका ४५ वर्षीय चोकट मुखिया बिन रहेका छन् भने घाइते पोखरिया–३ फुलरिया का ३९ वर्षीय विश्वजित राउत गिरी हुन् ।
राति साढे ९ बजेको समयमा वीरगन्ज महानगरपालिकाबाट पोखरियातर्फ जाँदै गरेको ना ४२ प १७५९ नम्बरको मोटरसाइकल पोखरिया नगरपालिकामा अनियन्त्रित भइ दुर्घटना भएको थियो ।
इलाका प्रहरी कार्यालय पोखरियाबाट प्रहरी टोलीले घाइतेहरूलाई उद्धार गरी उपचारका लागि पोखरिया अस्पतालमा लग्दा उपचारको क्रममा बिनको राति १० बजे मृत्यु भएको छ ।
गिरीको दाहिने हात भाँच्चिएकाले उनलाई थप उपचारका लागि नारायणी अस्पताल वीरगन्जमा भर्ना गरिएको जिल्ला प्रहरी कार्यालय पर्साले जनाएको छ ।
