लहान २२ माघ । सिरहाबाट नक्कली नोटसहित दुईजना पक्राउ परेका छन् । नक्कली नोट चार लाख पैँतीस हजार रुपैयाँसहित शनिबार साँझ दुई जनालाई सशस्त्र प्रहरी बलको इन्टेलिजेन्स ब्युरोले नियन्त्रणमा लिएको हो ।
पक्राउ पर्नेमा लहान नगरपालिका १९ स्थायी घर भएका ३० वर्षीय मोहम्मद ओसिन र सोही नपा १० स्थायी घर भएका २२ वर्षीय मोहम्मद राज शेख रहेका छन् ।
सिरहाको लहान नगरपालिका ८ स्थित पशुपति माध्यमिक विद्यार्थी नजिकको रोडबाट उनीहरूलाई नियन्त्रणमा लिइएको हो । उनीहरूको साथबाट एक हजार दरका चार सय ३५ थान नक्कली नोट, नोट बनाउन प्रयोग गरिने कागजको बण्डल, दुई थान मोबाइल सेट, सात थान सिमकार्ड तथा एक हजार पचपन्न रुपैयाँसमेत बरामद भएको छ । थप अनुसन्धान भईरहेको प्रहरीले जनाएको छ ।
