जनकपुरधाम १७ माघ । धनुषाको इलाका प्रहरी कार्यालय महेन्द्रनगरको हिरासतबाट ६ थुनुवा फरार प्रकरणमा तीन प्रहरी निलम्बनमा परेका हुन् ।
रातिको समय डिउटी बसेका तीनजना प्रहरी जवानलाई कारबाही स्वरुपम तत्कलका लागि निलम्बन गरिएको जिल्ला प्रहरी कार्यालय धनुषाले जनाएको छ । ईलाकामा जिम्मेबारीमा रहेका इन्सपेक्टर बेचन यादवसहितको २५ जनाको टिमलाई सोमबार नै जिल्ला तानिएको छ । प्रहरी नायव निरीक्षक मुक्तिनारायण चौधरीलाई जिम्मेबारीमा पठाइएको जनाएको छ ।
आइतबार राति करिब ३ बजेको समयमा हिरासतको भित्ता फोडेर विभिन्न मुद्दाका ६ जना थुनुवा फरार भएका थिए । जस मध्ये सोमवार हातहतियार मुद्दाका अभियुक्त मिथिला नगरपालिका २ नक्टाझिज बस्ने रोशन महतो र मंगलवार सार्वजनिक शान्ति विरुद्धको अपराध मुद्दा शिर्षकको थुनुवा क्षिरेश्वरनाथ नगरपालिका २ बस्ने २५ वर्षीय अमित मण्डल पक्राउ परेको ।
अन्य ४ जना थुनुवाको खोजी कार्य भईरहेको छ ।
