कैलालीमा गोली चल्दा एक जना घाइते

धनगढी ५ पुस । सुदूरपश्चिम प्रदेशको राजधानी कैलालीमा मंगलवार गोली चलेको छ । नेपाल भारत सीमा क्षेत्रमा पर्ने धनगढी उपमहानगरपालिकाको वडा नम्बर ९ जुगेडामा मंगलवार बिहान दुई राउण्ड गोली चलेको छ । जिल्ला प्रहरी कार्यालय कैलालीका अनुसार गोली लागेर एक जना स्थानीय घाइते भएका छन् । गोली लागेर शिवरामनगर टोलका स्थानीय प्रजापति विष्ट घाइते भएका छन् । घाइते विष्टले घरमा चोरी गर्न आएको समूहको गोली प्रहार गरेको र आफूले प्रतिकार गर्न खोज्दा चोरहरूले गोली चलाएको विष्टले दाबी गरे । यस्तै उनले घरबाट चोरहरूले अटो रिक्साका चार व्याट्री चोरेर लगेको बताएका छन । विष्टमाथि गोली प्रहार गरेपछि स्थानीयले होहल्ला गर्दा डाँकाहरूले अर्को राउन्ड फायर गरेका थिए । गोली चलाउनेहरूको समूहमा ४ जना रहेको तर उनीहरूको पहिचान भने हुन नसकेको जिल्ला प्रहरी कार्यालय कैलालीका प्रवक्ता डीएसपी वेदप्रकाश जोशीले बताउनुभएको छ ।