मिथिलाका शक्ति पीठहरूमा प्रसाद चढाउने र ‘खोँइछ’ भर्ने,कोे भिड

केपी रिपोर्टर,निभा झा
जनकपुरधाम १७ आश्विन । जनकपुरधामको शक्ति पीठहरूमा प्रसाद चढाउने र ‘खोँइछ’ भर्ने, भक्तजनहरुको भिड लागेको छ ।
राजा जनकको कुलदेवीका रूपमा चिनिने जनकपुरधामको प्रसिद्ध शक्ति पीठ राजदेवी मन्दिर, धनुषा रमदैयामा रहेको राजदेवी मन्दिर, महेन्द्रनगरको दुर्गा मन्दिर, महोत्तरीको सोनामाई मन्दिर, सप्तरीको छिन्नमस्ता भगवती मन्दिर र कङ्कालिनी मन्दिरलगायत शक्ति पीठहरूमा आज सोमवार बिहानैदेखि श्रद्धालु भक्तजनहरूको भिड लागेको हो ।
सन्तानको दीर्घायु तथा पारिवारिक सुख, शान्ति तथा समृद्धिको कामना गर्दै मिथालानीहरू खोँइछ भर्ने गर्दछन् । मिथिलामा माता दुर्गाको ‘खोँइछ’ भर्ने विधि निकै पौराणिक हो । सप्तमीको बेलुकीदेखि नै मिथिलानीहरूले ‘खोँइछ’ भर्ने गर्दछन् । यस वर्ष तिथिको हेरफेरले गर्दा सप्तमी, अष्टमी र कतिपयले अष्टमीको राति १२ बजेपछि ‘खोँइछ’ भर्ने वरिष्ठ साहित्यकार डा.राजेन्द्र बिमलले बताउँछन् ।
मिथिलामा छोरी घरबाट बाहिरिँदा उनलाई ‘खोँइछ’ दिने गरिन्छ । ‘खोँइछ’ मा पान, सुपारी, पैसा, धान वा चामल, सिन्दुर, बेसार, फूल र फल राखेर नयाँ कपडामा बाँधेर छोरीलाई दिने चलन छ । ‘खोँइछ’ भर्दा धनधान्यको प्राप्ति हुने र घरपरिवारमा सुख,शान्ति हुने जनविश्वास रहेअनुसार मिथिलानीहरू दुर्गामाताको खोँइछ भर्ने गर्दछन् ।
त्यस्तै प्रसाद चढाउनका लागि हिजो आईतवार राति १२ बजेदेखि नै ठूलो लाइन लागेको छ ।